RAIS KIKWETE AZIFUNGUA BARABARA ZA MKATA – HANDENI NA KOROGWE – HANDENI MKOANI TANGA

 Rais Dkt. Jakaya Mrisho Kikwete (mwenye koti jeusi katikati) akiwa na baadhi ya Mawaziri, Wabunge na Viongozi wa mkoa wa Tanga wakishiriki kuifungua rasmi barabara ya Handeni – Mkata na Handeni - Korogwe huko mkoani Tanga.

 Rais Dkt. Jakaya Mrisho Kikwete (aliyenyoosha mkono) akifurahia jambo na Waziri wa Ujenzi Mhe. Dkt. John Pombe Magufuli anayempongeza kiongozi wa kikundi cha ngoma ya Selo baada ya kutumbuiza wakati wa sherehe za ufunguzi wa barabara ya Mkata – Handeni - Korogwe. Anayeangalia (kulia) ni Waziri wa Viwanda na Biashara na Mbunge wa Handeni Dkt. Abdallah Kigoda.

 Rais Dkt. Jakaya Mrisho Kikwete (wa tatu kutoka kushoto) akiwa na baadhi ya Mawaziri, Wabunge na Viongozi wa mkoa wa Tanga wakishiriki kukata utepe kuifungua rasmi barabara ya Handeni – Mkata na Handeni - Korogwe huko mkoani Tanga.

Sehemu ya barabara ya Handeni – Mkata.

RAIS KIKWETE AZIFUNGUA BARABARA ZA MKATA – HANDENI NA KOROGWE – HANDENI MKOANI TANGA.

Rais wa Jamhuri ya Muungano wa Tanzania, Mhe. Dkt. Jakaya Mrisho Kikwete amewataka wakazi wa Handeni na maeneo inakopita barabara ya Mkata – Handeni na Korogwe – Handeni kutumia ipasavyo fursa ya kupatikana kwa barabara hizo za lami kuyaboresha maisha yao.

Rais Kikwete alitoa rai hiyo wakati wa sherehe za ufunguzi wa barabara  inayoinganisha Makao Makuu ya Wilaya ya Handeni na barabara kuu ya Tanga - Dar es Salaam kupitia Mkata na upande mwingine kuunganisha na barabara kuu ya Tanga – Moshi – Arusha kwa upande wa Korogwe.

Mhe. Rais ameelezea kuwa lengo la Serikali ni kuona kwamba, barabara ya Mkata hadi Handeni inaendelezwa hadi Kondoa kupitia Kiberashi kwani kufunguka kwa ukanda huu kutakuwa ni chachu kubwa ya kuinua shughuli nyingi za kiuchumi hasa kwa sekta ya kilimo katika maeneo hayo inakopita barabara hiyo.

Akiwasilisha tarifa ya utekelezaji wa mradi huo, Mtendaji Mkuu wa Wakala wa Barabara Tanzania (TANROADS) Eng. Patrick Mfugale alielezea kuwa barabara ya Mkata - Handeni ambayo imejengwa kwa kiwango cha lami ina urefu wa kilometa 53.2 ikiwa imejengwa na Mkandarasi Sinohydro Corporation Ltd kutoka Jamhuri ya Watu wa China kwa gharama ya Shilingi bilioni 57.3.  Eng. Mfugale alibainisha kuwa mkataba wa mradi huu ulisainiwa mwezi June 2009 na kazi zikakammilika mwezi Novemba 2012 baada kutatua changamoto ambazo zilikuwa zinakwamisha kukamilika kwa muradi huo mapema zaidi kama ilivyokuwa imepangwa kimkataba.

Ufunguzi wa barabara hiyo umeenda sambamba na ufunguzi wa barabara ya Korogwe hadi Handeni ambayo vile vile imekamilika kujengwa kwa kiwango cha lami.

Akitoa tarifa kuhusu miradi huo wa Korogwe – Handeni, Mtendaji Mkuu wa TANROADS Eng. Patrick Mfugale alielezea kuwa Mkandarasi Sinohydro Corporation Ltd ndiye pia iliyeijenga barabara hiyo ambayo ina urefu wa kilometa 65. Mkataba wa Mradi huu ulisainiwa mwezi June 2009 na kazi zikakamilika mwezi June 2013 na imejengwa kwa ghrama ya Shilingi bilioni 63.2. Kiasi cha Shilingi bilioni 3.3 kimelipwa kama fidia kwa wale waliofuatwa na barabara hiyo katika baadhi ya maeneo.

Naye Waziri wa Ujenzi Mhe. Dkt. John Pombe Magufuli akielezea baadhi ya faida zitakazopatikana kutokana na kujengwa kwa barabara hizo alibainisha kuwa barabara ya kutokea Korogwe hadi Handeni ndiyo barabara itakayosaidia kwa kiasi kikubwa kupunguza msongamano wa magari katika barabara  kuu ya TANZAM hasa kwa wasafiri na wasafirishaji wanaotokea maeneo ya Iringa, Mikumi na mengineyo katika ukanda huo.

Waziri Magufuli alifafanua kwa kwa kupitia Mikumi, Kilosa, Turiani, Mziha hadi Handeni na kuelekea Korogwe au Mkata mkoani Tanga kunapunguza zaidi ya kilometa 120 tofauti na kuzungukia Morogoro na Chalenze.

“Hivi sasa mtu anayetokea Iringa analazimika kupitia Mikumi na Morogoro mjini hadi Chalinze ndipo aelekee Tanga, mzunguko ambao ni mrefu kulinganisha na barabara hii ya kupitia Mikumi, Kilosa Magole, Mziha hadi Handeni” alisistiza Waziri Magufuli.

Kwa upande mwingine Rais wa Jamhuri ya Muungano wa Tanzania, Mhe. Dkt. Jakaya Mrisho Kikwete aliwafahamisha wananchi waliohudhuria kwa wingi katika sherehe hizo kuwa, tayari upembuzi yakinifu na usanifu wa kina umekamilika kwa barabara inayoanzia Handeni kuelekea Kiberashi hadi Kwamtoro mkoani Dodoma.

Rais Kiwete aliabinisha kuwa hatua hiyo pia imefikiwa kwa barabara ya Handeni, Mziha, Dumila, Kilosa hadi Mikumi. “Hatua inayofuata ni kutafuta fedha za kujenga maeneo katika sehemu hizo ambayo bado hayajapata makandarasi” alifafanua zaidi Rais Kikwete.  

Hata hivyo Mhe. Kikwete alitumia fursa hiyo kuwaasa wasafirishaji kuzingatia masuala ya usalama barabarani kwa kupakia mizigo kulingana na viwango vilivyowekwa kisheria. Alielezea kuwa moja ya adui wakuu waharibifu wa barabara ni uzidishaji wa mizigo kupita viwango vilivyowekwa kisheria.

Mheshimiwa Kikwete anaendelea na ziara yake mkoani Tanga ambapo pia ataweka jiwela msingi kuzindua ujenzi wa barabara ya Korogwe – Mkumbara.