Breaking News: Kesho kutakuwa na mgomo wa madereva wa daladala Manispaa ya Morogoro, jiandaeni

Habari zilizotufikia punde zinaeleza kuwa kesho kutakuwa na mgomo wa madereva wa daladala kwenye Manispaa ya Morogoro. Mgomo huo utazihusisha daladala za maeneo yote ya manispaa ya Morogoro jambo ambalo litapelekea kuwepo kwa shida kubwa ya usafiri mjini hapa.

Sababu za kufanya mgomo huo ni kupinga vitendo vya kukamatwa na kutozwa faini kubwa vinavyofanya mara kwa mara na askari wa usalama barabarani.

Katibu wa umoja wa daladala njia ya Kilakala, George John ameuambia mtandao huu kuwa wamelazimika kupanga kufanya mgomo huo kutokana na kukithiri kwa uonevu unaofanywa na askari wa usalama barabarani ambao wamekuwa wakiwakamata mara kwa mara na kuwatoaza faini kubwa.

John amesema mgomo huo utahusisha kuegesha magari na kuandamana na mabango katika maeneo tofauti tofauti ya mji hii ni kutokana na ombi lao la kufanya maandamano hadi kwa Mkuu wa Wilaya kutupiliwa mbali na Mkuu huyo wa Wilaya kwa madai kuwa ametingwa na maandalizi ya kiongozi wa juu wa Serikali ambaye atazulu mkoani humo hivi karibuni.

Mtandao wa Safarimoja umemtafuta (simu) Meya wa Manispaa ya Morogoro, Amir Nondo ili kupata kauli yake juu ya mgomo huo, "Mimi sina taarifa za mgomo huo lakini kama wamepanga kugoma kwa sababu ya kuonewa na askari wa barabarani hilo ni haki yao japo kwangu mimi siwezi kusapoti kwa kuwa jambo hilo litawaumiza wananchi wa Manispaa yangu"

Nondo anasema hakubaliani na askari wa barabarani kuwaonea madereva wa daladala lakini pia akisisitiza kuwa hakubaliani pia na madereva kukiuka taratibu na sheria za barabarani.

"Kama kuna uonevu unafanywa na askari barabarani mimi sikubaliani nao na ni haki ya madereva kugoma, lakini haiwezekani madereva wote wakaonewa pengine wanakiuka sheria za barabarani, sasa kama unafanya makosa ni lazima utapewa tu adhabu kwa kupigwa faini" anasema Nondo.

Safarimoja pia imezungumza pia na Kamanda wa Jeshi la Polisi Mkoani Morogoro, Faustine Shilongile ambapo amekiri kupata taarifa ya mgomo huo na kwamba jeshi la polisi halitalegeza uzi kwa kuwakamata na kuwatoza faini wale wote wanaokwenda kinyume na utaratibu wa sharia za barabarani.

Amesema mgomo hauwezi kupindua sheria na kwamba hauwatishi askari kuendelea kusimamia sheria hizo ambazo mara nyingi zimekuwa zikikiukwa na madereva wa daladala mkoani humo na kuanza kulalamika pale wanapokamatwa na kupigwa faini.

"Ni kweli nimepata taarifa za mgomo, na sisi tunasubiri hiyo kesho wagome halafu tutachukua hatua stahiki maana hatuwezi kuteteleshwa na migomo inayoshinikiza kuacha kusimamia sheria, wao kama wanafanya makosa wategemee kukamatwa na kulipishwa faini hata kama ni mara sita kwa siku moja" anasema Kamanda Shilongile

Faini ya kosa moja ni shilingi 30,000 kwa maana nyingine dereva kama atapatikana na makosa manne kwa siku atatakiwa kulipa shilingi 120,000 jambo ambalo madereva wanalipinga vikali.

Mtandao wa Safarimoja unatoa tahadhali kwa wakazi wa Manispaa ya Morogoro kujiandaa kwa lolote ili kuweza kuwahi kazini na kufanikisha shughuli zako nyingine kwa kutumia usafiri mwingine endapo kweli azma ya madereva hao wataitekeleza.

Unahabari ya mambo ya usafiri? tuma kupitia safarimojatz@gmail.com